O PSOE aumenta a súa vantaxe e obtería un 31,6% dos votos segundo o último barómetro do CIS, no que o PP perde a segunda posición, superado por Ciudadanos, que alcanza o 21% fronte ao 18,2% dos populares e Podemos, que sobe ata o 17,3%.
O barómetro do Centro Investigacións Sociolóxicas (CIS) foi elaborado entre o 1 e o 9 deste mes de outubro, coincidindo coas polémicas que afectaron a varios ministros, a negociación para o acordo orzamentario con Podemos e o aniversario do 1 de outubro en Cataluña.
Segundo a enquisa, o PSOE subiría do 30,5 do pasado mes de setembro ao 31,6 de outubro, mentres que o PP cae máis de dous puntos nese mesmo período, do 20,8 ao 18,2.
Chama a atención a subida de Cs, que pasa do 19,6 en estimación de voto ao 21%.
Unidos Podemos e as súas confluencias experimentan tamén unha subida similar á do PSOE, cun incremento de 1,2 puntos ata o 17,3%, manténdose iso si, na cuarta posición.
En voto directo, sen a estimación que realiza o CIS, o PSOE tamén é a primeira forza política, cun 21,7 -18,6 en setembro- e Cs tamén é o segundo partido máis citado, cun 15,3 e xa en terceiro lugar o PP, que perde tres décimas, co 12,6.
Unidos Podemos e as súas confluencias gañan máis de dous puntos en voto directo, e sitúanse no 12,1%.
Volvendo á estimación de voto do CIS, en quinta posición sitúase ERC, cun 4,3% -dúas décimas máis- seguido do PACMA, cun 1,6%, mentres que Vox baixa unha décima nun mes, ata o 1,3.
O PDeCAT baixa do 1,9% ao 1,4, do mesmo xeito que Bildu que queda no 0,8% dos sufraxios.
Por contra, o PNV sobe lixeiramente ata o 1,0%, mentres que Coalición Canaria perde unha décima, ata o 0,1% en estimación de voto.
