Tras meses de bloqueo nas negociacións, Abanca (23,8%), Kutxabank (16,3) e Sacyr (15,5) acordaron a venda do 55,6% que ostentan en Itínere, a concesionaria en Galicia da AP-9 a través de Audasa, e da AG-55 (A Coruña-Carballo) e a AG-57 (Puxeiros-Val Miñor), a través da sociedade Autoestradas de Galicia. Itínere tamén controla o 18,3% de Acega, a sociedade que explota a AP-53 (Santiago-Lalín), que xa ten a Globalvía como accionista maioritario (61,4%).
Segundo un comunicado remitido á CNMV, Globalvía valora o 100% de Itínere en 1.300 millóns de euros, o que implica que desembolsará aos tres socios 722,8 millóns, dos que a entidade galega levará uns 309,4.
Abanca, Kutxabank e Sacyr adiántanse así á resolución que debe ditar a Corte de Arbitraxe de Madrid, que, segundo explicou o xoves o propietario da entidade con sede en Betanzos, Juan Carlos Escotet, prevíase para outubro e debía pronunciarse sobre a negativa do fondo estadounidense Corsair, que controla o 37,9% de Itínere, a facilitar a desinversión. A pesar de que en xullo de 2016 Liberbank (5,8%) tamén quería vender o seu parte a Globalvía, aliñouse con Corsair. Esta semana, Escotet non descartou que as partes puidesen "chegar a un acordo privado previo", sen esperar a pechar a arbitraxe.
Agora ábrese un período no que Corsair pode exercer unha opción preferente de compra. Para iso, polo menos debe igualar a oferta de Globalvía.
DIVIDENDO DE ABANCA. A operación transcendeu no mesmo día en que o consello de Abanca aprobou repartir un dividendo de 0,016 euros brutos por acción con cargo aos resultados de 2018, que ata xuño se traduciron nun beneficio de 247 millóns (+7,8%). En total, o luns abonará 36,8 millóns, dos cales a maior parte corresponderá a Escotet, que controla o 86,79% do capital.
