O alcalde de Vigo, o socialista Abel Caballero, sinalou este luns que recibiu a chamada do presidente do Goberno, Pedro Sánchez, para ofrecerlle "todo o apoio" tras o derrube dunha pasarela no festival de deporte e música urbana do Marisquiño. O tamén titular da Federación Española de Municipios e Provincias (FEMP) comentou, así mesmo, nunha rolda de prensa no Concello tras visitar a varios feridos, que se puxo en contacto con el o secretario de Estado de Infraestruturas, Transporte e Vivenda, Pedro Saura, e que lle avanzou que "ordenou investigar", de maneira que Portos do Estado profundará no ocorrido.
Caballero remarcou que "hai que saber por que se produciu ese derrubamento", dado que "non é o paseíño de madeira", posto que debaixo deste "había unha estrutura de formigón" consistente e sólida, cravada no fondo da ría, que é a que veu abaixo nun "fallo estrutural masivo".
O suceso, proseguiu, "non se produce porque haxa unha madeira en mellor ou peor situación". "Pedro Saura xa ordenou investigar, chamoume tamén, e logo desa acción de Fomento, saberemos a que se debeu este colapso de toda esa estrutura" e que non foi problema de mantemento.
Hai unha parte que se fixo por un "efecto estético", a pasarela de madeira, pero "esa non é a zona que colapsou", a pesar dalgunha "interpretación política interesada, non no presidente do Porto, e debo dicilo", matizou exculpando a Enrique López Veiga, que si mencionou un fallo estrutural. "Os grandes ferros de formigón caen e apóianse contra o fondo da dársena... O que cae é unha estrutura do porto, dun peirao do porto coa catalogación de náutico deportivo", concretou Caballero.
Os afectados víronse obrigados a subir por ese armazón "con bastante pendente", dixo o alcalde, sendo dúas as persoas que quedaron atrapadas, razón que levou ao corpo de bombeiros a facer unha operación especial para a súa liberación, que "custou bastante, non foi unha tarefa fácil". Producíronse dúas comprobacións exhaustivas, con mergulladores, inmersións e cámaras térmicas, un dispositivo que se mantivo ata ben entrada a madrugada co obxecto de comprobar que non houbese xente "atrapada baixo o cemento".
Caballero compartiu que telefonou ao presidente galego, Alberto Núñez Feijóo, unha primeira vez, e despois unha segunda, chamada esta á que contestou o delegado da Xunta en Vigo, Ignacio López-Chaves. Sobre a empresa organizadora da cita musical e deportiva, afirmou que cumpriu como sempre e que o aforamento estipulado era de 4.500 persoas máximo, pero non chegou a cubrirse.
Caballero fixo fincapé na súa conferencia ante os medios de comunicación en que non houbo "un problema de mantemento, o que pasou é que se afundiu esa inmensa plataforma de cemento que hai debaixo das táboas, sólida, pilotada e ancorada... As táboas son un adorno, non aguantarían nin dez persoas".
Para rematar, desvelou que tamén se comunicou con el o expresidente do Goberno José Luis Rodríguez Zapatero, de quen recibiu un "recado cariñoso". Caballero enviou un "abrazo moi forte a todas as mozas e os mozos que resultaron feridos, un abrazo da proximidade, o abrazo de estar xuntos nunha cidade, e o abrazo de sentirnos xuntos... Esta xente nova, magnífica e extraordinaria, que estaba a gozar dun concerto e que se viron atrapados nun derrubamento colosal".
