O octoxenario acusado de raiar decenas de coches no barrio do Calvario foi absolto nunha das causas que tiña abertas ao aplicárselle a eximente de responsabilidade penal pola "súa vulnerabilidade psíquica". Con todo, deberá cumprir dous anos de internamento e facer fronte a 5.000 euros en concepto de responsabilidade civil polos danos causados.
En concreto, o octoxenario raiacoches, como xa é coñecido, acudiu ao xulgado do Penal 1 de Vigo para responder os danos a unha ducia de coches presuntamente causados por el mesmo valéndose dunha navalla en marzo de 2017.
Hai uns días, a súa avogada xa aludía a un informe forense realizado ao seu cliente que apuntaba a unha situación de "vulnerabilidade psíquica" e "posible demencia e trastorno de base depresivo e de personalidade". O octoxenario, que foi detido en febreiro por non acudir a unha requisitoria do xulgado por unha das súas causas pendentes, reside desde entón nunha residencia de Tui.
Vecinos das zonas do Calvario e A Doblada viñan denunciando desde hai tempo, e con maior intensidade a comezos de ano, as andanzas deste home, ao que a Policía relaciona con máis dun milleiro de incidentes. Tanto é así que ademais de raiar os coches e sabotear as fechaduras, tanto de vehículos como de portais de edificios da zona, tamén protagonizou episodios violentos cando o sorprenderon en plena faena. Os veciños chegaron a colocar carteis de "búscase" coa súa imaxe.
