Achan un valioso manuscrito medieval do século XIII arquivado de Ourense

Un valioso manuscrito medieval, do século XIII, con dous fragmentos da obra haxiográfica de Bernardo de Brihuega, un estreito colaborador do rei Afonso X (1252-84), foi achado no Arquivo provincial de Ourense, informou este domingo a Xunta nun comunicado.

Trátase de dous fragmentos –un bifolio e unha folla solta– en castelán titulados Vidas y pasiones de los apóstoles, que datan de finais do século XIII ou comezos do XIV, que constitúen o testemuño máis antigo conservado desta obra, da que “ata agora só se coñecían algunhas copias tardías (desde segunda metade do XIV ata comezos do XVI) en latín, castelán e portugués, precisa Xunta.

Os fragmentos poderían pertencer a un códice “seguramente de procedencia rexia” copiados da tradución castelá íntegra do libro II de Bernardo de Brihuega sobre a vida e as paixóns dos apóstolos e o seu contido correspóndese con varios capítulos da vida dos santos Tomás, Marcos e Andrés.

Segundo o Goberno galego, a relevancia do bifolio obedece a que foi utilizado “como capa dun libro de apeo dos bens do convento feminino de Santa Clara de Allariz, único mosteiro galego de fundación real” e permite reconstruír o itinerario cultural desde a corte castelá ata o territorio galego e a súa eventual difusión ao reino portugués nas primeiras décadas do século XIV.

A colección haxiográfica, compilada baixo o mecenado do rei Afonso X o Sabio, está conformada por cinco libros sobre a historia da salvación e dos seus protagonistas a partir do Novo Testamento. 

A tradución desta obra ao castelán, realizada polo propio de Brihuega, ademais de circular como unha obra independente, sería usada como “fonte principal para a composición dalgunhas seccións da compilación universal de Afonso X”, e tivo difusión no occidente peninsular, engade a Xunta. Os dous fragmentos permanecen gardados no Arquivo histórico provincial de Ourense, dependente da Consellería de Cultura, que conta con 221 fondos, 153 deles de orixe privada.