Salvamento Marítimo activou sobre as 10.30 horas deste mércores o Plan Territorial de Contaminación Mariña Accidental de Galicia (Plan Camgal) a raíz da vertedura ao mar duns 4.000 litros de gasóleo no municipio coruñés de Corcubión.
Segundo a información do CAE 112-Galicia, o combustible derramado provén do depósito subterráneo dun colexio situado no paseo marítimo da localidade, na rúa Maruja Mallo. Os servizos de urxencias cren que unha tubaxe deste depósito rompeu e filtrou combustible pola terra ata chegar a un manancial. Os primeiros restos de combustible na zona detectáronse xa durante o fin de semana. A vertedura prexudica particularmente á Praia de Quenxe e, aínda que a maior parte da mancha está na area, afecta tamén ao mar.
Na zona instaláronse barreiras e dispositivos absorbentes para frear a contaminación desta vertedura, que está concentrada nunha extensión de 2.000 metros cadrados. Ademais dos efectivos que están a intervir por terra, na zona permanecen a esta hora dúas embarcacións de Salvamento Marítimo, o buque Irmáns García Nodal e o auxiliar Don Inda.
O Plan Camgal permite unha resposta máis áxil e coordinada ante un episodio de contaminación como este. Como medida preventiva, a zona quedou pechada ao marisqueo, aínda que os bancos non se viron danados.
Activado o Plan Camgal por unha vertedura de 4.000 litros de gasóleo no mar en Corcubión
O combustible provén do depósito subterráneo dun colexio situado no paseo marítimo da localidade
