Un forense asegurou que é "probable" que a sustancia que a muller acusada de contratar a tres sicarios para matar o seu marido lle deu co café afectase o cerebro do home, que como consecuencia sufriría unha "deterioración do sistema nervioso". Así o manifestou durante a segunda sesión do xuízo celebrado na Audiencia Provincial da Coruña contra esta señora e os tres homes aos que presuntamente pagou para librarse do seu esposo.
A Fiscalía pide para ela unha pena de 14 anos de prisión por tentativa de asasinato, roubo con violencia e denuncia falsa, xa que inicialmente acudira a denunciar á Policía que lle fixeran pagar diferentes cantidades de diñeiro —uns 45.000 euros— baixo a ameaza de facerlle dano a ela, ao seu marido e ao seu fillo. Para as tres persoas presuntamente contratadas, a Fiscalía solicita penas de doce anos por tentativa de asasinato e roubo con violencia, xa que subtraeron as pertenzas ao home e deixárono tirado nunha pista forestal.
Na segunda sesión do xuízo declarou o médico forense que realizou un informe en relación á intoxicación do home debido a unha sustancia que lle botou no café a súa propia muller, segundo recoñeceu ela mesma no xuízo. O consumo desta sustancia provocaría á vítima unha "deterioración do sistema nervioso", segundo indicou o forense, quen sinala que o home manifestaba unha "tendencia ao sono". "Afectou á súa integridade cerebral", apuntou o forense, que descarta calquera tipo de dano cerebral na vítima como consecuencia da inxesta desta sustancia que a muller lle botou no café para durmilo e entregalo aos sicarios.
