Un veciño da parroquia de Paramos que perdeu a súa vivenda pola explosión dun almacén clandestino onde se almacenaba material pirotécnico intentou agredir ao seu propietario, Francisco González Lameiro, á súa chegada este martes pola mañá aos xulgados de Tui. Axentes da Garda Civil e da Policía Local tiveron que mediar para evitar a agresión.
Ademais, outra veciña gritoulle "lercha" e preguntoulle "por que non o gardaches na túa casa", en alusión ao material pirotécnico que explotou e levou por diante decenas de casas e cobrouse dúas vidas.
O dono da pirotecnia La Gallega chegou aos xulgados de Tui pouco antes das dez da mañá nun coche sen rotular da Garda Civil e, do mesmo xeito que fixese o pasado venres, ocultou o seu rostro baixo unha capucha.
A Garda Civil detívoo o luns por segunda vez logo de achar este fin de semana senllos almacéns ilegais nos que había ocultos 474 quilos de pólvora e 172 quilos doutros produtos para a fabricación de explosivos, así como 1.150 quilos de materia prima para producir artefactos pirotécnicos.
A titular do xulgado de instrución número 1 de Tui, en contra do criterio do fiscal, acordou o pasado venres deixalo en liberdade con obrigación de comparecer no xulgado cada 15 días.
Desde entón é investigado xudicialmente polos presuntos delitos de dano catastrófico na modalidade de delito de risco provocado por explosivo e outros axentes, ademais de por homicidio imprudente, danos imprudentes e lesións imprudentes.
O veciño que intentou agredir ao pirotécnico explicou que ía a Facenda a buscar uns papeis e que pasou por diante dos xulgados xusto cando chegaba alí o seu veciño, e que entón se lle cruzaron os cables" e intentou golpearlle cos puños.
Jaime Bugallo dixo confiar "entre comiñas" na Xustiza e fixo votos por que haxa comprensión cos que quedamos sen nada". Non en balde, a súa é unha das vivendas que quedaron arrasadas tras a explosión do almacén ilegal de Paramos.
"Sinto impotencia", proclamou Bugallo, que se ratificou en que tiña "sospeitas" de que Francisco González Lameiro almacenase material da pirotecnia xunto á súa casa, pero non que fose material explosivo.
