O vicepresidente da Xunta, Alfonso Rueda, dixo estar "preocupado" e tamén "expectante" polos resultados das eleccións en Andalucía, porque dá por feito que "van marcar outro episodio na política nacional, sen ningunha dúbida".
No almorzo informativo de Fórum Europa-Tribuna Galicia que protagonizou este venres en Vigo, Alfonso Rueda matizou que esa preocupación é común en todos os partidos precisamente porque "a ninguén se lle escapa", dixo, que as eleccións andaluzas terán a súa translación ao ámbito político nacional.
"Como responsable no meu partido", dixo Rueda, que é secretario provincial do PP en Pontevedra, "claro que estou preocupado e expectante".
Con todo, espera os "mellores resultados" para o PP nesa cita, pese que haxa xente que espera que non", pois cre que o partido "fixo un bo traballo".
Preguntado por se o modelo do PP de Galicia é exportable a outras latitudes da xeografía nacional, Roda salientou que "cada un no seu territorio sabe o que ten que facer", e engadiu: "Non pretendemos darlle leccións a ninguén".
Respecto da posibilidade dun súper domingo electoral en maio de 2019, o vicepresidente da Xunta dixo que "especular" sobre isto "é moi aventurado, porque quen ten que decidilo -o Goberno, Pedro Sánchez- nin sequera ten capacidade de decisión real para poder facelo, polo menos non en exclusiva".
Abundou en que Sánchez convocaraas cando "crea que máis lle convén a el, non a España", e cando lle deixen aqueles que lle sosteñen, fronte aos cales está a ceder todos os días".
Rueda opinou que cada elección "debe ter o seu ámbito", e engadiu que se o presidente do Goberno quere unha opinión, "xa lla deron os seus propios baróns, que non queren facer coincidir as eleccións autonómicas e municipais coas do señor Sánchez. Que se pregunte por que", finalizou.
