O xulgado de primeira instancia e instrución da localidade ourensá de Bande decidiu arquivar a causa que se seguía contra sete persoas sospeitosas de inducir á prostitución a unha moza de vinte e un anos que apareceu morta no encoro de Lindoso, en Lobios, case na fronteira con Portugal, en decembro de 2016.
Segundo indicaron a Efe fontes xurídicas, a xuíza acordou o sobresemento provisional do caso ante a falta de indicios.
Os feitos tiveron lugar en decembro de 2016 na localidade ourensá de Grou, cando particulares alertaron da presenza de varias pertenzas abandonadas á beira do río e posteriormente apareceu un cadáver flotando no encoro de Lindoso, que se atopa na fronteira con Portugal.
Nun primeiro momento, os investigadores apuntaron a un posible suicidio.
Tras dous anos de pescudas, a Policía Nacional arrestou a sete persoas, cinco homes dúas mulleres, no municipio de Lobios (Ourense), no marco das investigacións iniciadas tras a aparición do corpo dunha muller de vinte e un anos.
Tras prestar declaración, os sete implicados foron postos en liberdade con medidas cautelares, investigados por un suposto delito de prostitución.