O novo curso escolar arrincou este mércores, día 5 de agosto, nos centros da rede pública autonómica Galiña Azul cun total de 8.260 nenos e nenas de 0 a 3 anos admitidos, 237 máis que o curso anterior.
Segundo explicou a Consellería de Política Social, por provincias, un total de 3.478 menores foron admitidos na da Coruña, 2.933 na de Pontevedra, 926 na de Lugo e 863 na de Ourense.
Ademais, no que respecta á lista de espera provisional, a Xunta indicou que o inicio do curso rexistra 2.981 solicitudes que no caso de que o teñan pedido, poderanse acoller ao programa Bono Concilia e recibir unha axuda de entre os 45 e 250 euros mensuais. Unha medida que, segundo apuntou a Xunta, fai que "a lista de espera volva ser de cero un curso máis".
O departamento que dirixe José Manuel Rey Varela tamén destacou que se reservan 492 prazas para urxencias e que o número de vacantes ascende a 1.292, a maioría das cales se corresponden con prazas non cubertas no grupo de idade de 0 a 1.
No presente curso 2018-2019, Galicia pon a disposición das familias un total de 24.081 prazas sostidas con fondos públicos dos cales 10.264 repártense entre as 172 escolas infantís que conforman o mapa de centros da Galiña Azul.
Esta cifra supón un incremento do 4,7% con respecto ao curso pasado, con 484 novas prazas e a entrada en funcionamento de cinco novas escolas infantís en Santiago, Lugo, Ourense, A Estrada e Mos, así como o regreso á actividade prevista para o próximo mes de outubro da escola Santa Susana en Santiago.
O resto das prazas complétanse coas que dependen de entidades de iniciativa social, da rede de escolas municipais, as prazas subvencionadas en escolas privadas que este curso se incrementan un 16% e resolveranse nos próximos días, as financiadas a través do Bono Concilia e as escolas que xestionan entidades como o Servizo Galego de Saúde (Sergas) e as universidades.
Esta oferta, segundo apuntou a Xunta, sitúa á comunidade cun cociente de atención en prazas escolares de 0 a tres anos no 41%, oito puntos por encima das media aconsellada pola Unión Europea.
Precisamente, o conselleiro de Política Social, José Manuel Rey Varela, visitou este mércores en Mondoñedo o centro Galiña Azul con motivo da apertura do curso, unha visita na que estivo acompañado polo xerente do Consorcio Galego de Servizos de Igualdade e Benestar, Perfecto Rodríguez.
