Os axentes forestais e ambientais de Galicia manifestáronse na tarde do mércores polas rúas de Vigo "en defensa dos montes galegos e para reivindicar melloras laborais das persoas que coidan deles e deféndenos do lume", segundo aseguraron moitos dos asistentes.
A manifestación saíu ás 19.00 horas da Praza de España da cidade olívica e contou coa participación de centos de persoas procedentes de toda Galicia.
O delegado da UXT, Carlos San Miguel, explicou os motivos polos que esta manifestación se realizou en Vigo. "Esta manifestación faise en Vigo, precisamente, para recordar que foi unha cidade acosada polo lume en outubro de 2017. Sabemos que sufriron o desamparo, nalgúns momentos, de non estar perfectamente atendidos e alégranos que estean este mércores connosco na reivindicación da mellora do servizo público da extinción de incendios", dixo.
Desde UXT recordaron que non lograron chegar a un acordo coa Xunta a pesar de levar moitos meses con negociacións, "nun principio faláronnos de melloras salariais e laborais, pero non temos nada por escrito e por iso tivemos que ir á folga", incidiu este delegado sindical.
Os traballadores levan en folga indefinida desde o pasado 1 de agosto para reivindicar un novo acordo laboral que mellore as súas condicións de traballo xa que as actuais son "bastante precarias", segundo o axente forestal José Manuel Coucelo.
Os axentes forestais lamentan a actitude da Xunta de Galicia e en concreto da conselleira de Medio Ambiente, Beatriz Mato, que non se dignou a reunirse connosco para buscar unha solución".
Galicia ten na actualidade 540 axentes forestais e ambientais, dos cales, 150 están na provincia de Pontevedra.
O secretario xeral do PSDEG-PSOE, Gonzalo Caballero, quixo apoiar esta manifestación coa súa presenza, mostrou o apoio dos "socialistas galegos en defensa do patrimonio natural" e asegurou que "as políticas do PP no coidado dos montes fracasaron".
Caballero apoiou as demandas dos axentes forestais e acusou ao presidente da Xunta, Alberto Núñez Feijóo, de abandonar "o medio forestal galego".
Os socialistas tamén lle pediron a Feijóo que "rectifique as súas políticas nesta materia e atenda as 100 propostas realizadas polo PSOE para mellorar e coidar o patrimonio natural galego".
