Os sindicatos que representan aos axentes forestais e ambientais de Galicia volverán reunirse o vindeiro luns co director xeral de Función Pública, dependente da Consellería de Facenda, para negociar un novo acordo laboral.
Tras a reunión do martes, en véspera do comezo da folga indefinida que finalmente só afecta aos axentes forestais (cuns servizos mínimos do 100%), Función Pública remitiu este mércores un novo documento que segundo os traballadores é case idéntico ao anterior e, xa que logo, "insuficiente".
Por iso, o comité de folga (convocada por UXT e CIG) rexeita a proposta e mantén o paro indefinido, suspendido temporalmente para os axentes ambientais por razóns de seguridade.
Neste escenario, ambas as centrais anunciaron que analizarán o luns en asemblea o resultado do encontro con responsables da Administración autonómica nas instalacións de San Caetano.
DENUNCIA. Tamén esperan coñecer a resolución xudicial da denuncia presentada contra os servizos mínimos, ao entender que "non garanten a seguridade dos traballadores" (establecéronse no 20% para os axentes ambientais).
Os dous colectivos profesionais desenvolverán a partir das 10,30 horas unha concentración na sede da Xunta e o comité de folga prevé comparecer ás 13,00 horas en rolda de prensa para informar o contido da cita e da decisión da asemblea.