O total de casos de coronavirus activos en Galicia reduciuse nas últimas 24 horas en 17 persoas, polo que son 163 os afectados na comunidade. A caída débese principalmente ao descenso nos casos rexistrados na área sanitaria de Lugo (24 menos que na xornada precedente), onde o total de infectados na área descende a 74. A maior parte correspóndense co brote na Mariña, que aínda afecta a 48 persoas. Con todo, hai sete novos positivos en Vigo e dous na Coruña.
En concreto, na área sanitaria coruñesa hai 39 casos activos —dous máis que o—mércores ; mentres que en Vigo os positivos ascenden a 27 —tras sete novos, correspondentes seis deles ao brote do Porriño—. Pola súa banda, tanto Ourense como Santiago rexistran un infectado menos e contan con 5 e 10, respectivamente.
Á súa vez, a área sanitaria de Pontevedra continúa con nove casos activos á vez que Ferrol permanece sen ningún positivo.
Do total de pacientes positivos, oito están en unidades de hospitalización, do mesmo xeito que na xornada do mércores. Mentres, 155 permanecen no seu domicilio —17 menos—. Así mesmo, as unidades de coidados intensivos galegas continúan sen pacientes de coronavirus.
NINGÚN CASO VINCULADO ÁS RESIDENCIAS. Ademais, xa non hai ningún caso —nin empregado nin usuario— vinculado a residencias de maiores. Sanidade apunta que, ata a data, curáronse 11.187 persoas, 56 máis que na xornada do mércores, e que ata o momento faleceron 619 pacientes con Covid-19 en Galicia.
A última vítima foi notificada o 10 de xuño e correspóndese cun home de 83 anos que estaba ingresado no Complexo Hospitalario Universitario de Vigo. Do total de mortes, 274 estaban vinculadas con residencias.
O número de PCR realizadas ata este xoves na comunidade galega ascende a 238.786, que son 1.999 máis das que figuraban nos datos do mércores.
A Consellería de Sanidade reiterou que a cidadanía debe empregar o número 061 só para urxencias ou casos graves e aconsella utilizar o número gratuíto 900 400 116 para consultar dúbidas ou síntomas leves de coronavirus.
