Bate o récord ao percorrer o Camiño Francés en menos dun día e sofre un accidente tras cruzar a meta

O ciclista vasco Mikel Azparren cumpriu este domingo o seu "reto persoal", que el mesmo define como "á vasca", de bater a marca de completar o Camiño Francés desde Roncesvalles a Santiago en menos dun día, ao conseguir percorrer os 751 quilómetros nun tempo de 23 horas e 51 minutos.  Pasadas as once da mañá entraba na Praza do Obradoiro, pero tras cruzar a meta instalada para a ocasión, un home achegouse para axudalo a frear e, accidentalmente, empuxouno ao chan. Como consecuencia do impacto, tivo que ser trasladado a un centro hospitalario, para valorar a gravidade das lesións sufridas, entre elas, a rotura da súa clavícula. 

Aínda que foi un final abrupto e inesperado, Mikel Azparren quedouse co positivo do seu desafío, o éxito persoal de lograr, ao terceiro intento, superar o récord de percorrer o Camiño Francés, atravesando terras de Navarra, A Rioxa, Burgos, León, Lugo e A Coruña en menos dun día, en 23 horas e 51 minutos. "Foi moi satisfactorio poder conseguir algo que loitei desde hai tempo", explicou aínda desde o Hospital. "O importante era facer o Camiño de Santiago tradicional, pasando polas cinco provincias, porque o Camiño Francés ten un compoñente emocional moi forte". 

Entrou como unha bala no Obradoiro, pero unha persoa achegouse, incomprensiblemente, a querer frealo, e ao frealo saltou polo aire, lanzouno da bicicleta e caeu contra o chan

O ciclista e adestrador, de 47 anos, intentara cumprir o reto xa en tres ocasións anteriores, completándoo en 2013 e 2015, aínda que con tempos superiores ás 24 horas. Tamén volveu acometer o desafío a pasada semana pero tivo que abandonalo, debido a complicacións musculares.

RETO "Á VASCA". Finalmente, este domingo logrou completar un reto persoal que comezou case como unha aposta simbólica "á vasca" entre amigos e compañeiros de profesión. "A idea do reto foi á vasca, a típica escena de cuadrilla, que alguén di a que non sodes capaces de facer isto, e eu dixen, pois eu si, e así foi a primeira vez en 2013 e despois intenteino no 2014, saíume mal, no 2015 conseguín un tempo de 24 horas e 15 minutos, o máis cerca e agora logreino", expresou.

LESIONADO ACCIDENTALMENTE. A súa chegada ao Obradoiro, con bastante público ao redor da meta instalada, tivo un final insospeitado. Ana García, o seu mánager, explicou que "entrou como unha bala no Obradoiro, pero unha persoa achegouse, incomprensiblemente, a querer frealo, e ao frealo saltou polo aire, lanzouno da bicicleta e caeu contra o chan". O ciclista vasco, tamén adestrador, queda, en todo caso, co positivo da experiencia, e co seu amor polo ciclismo e o Camiño de Santiago. 

#Santiago24h chegou en 23h 50 minutos, pero nada máis pasar a meta caeuse. pic.twitter.com/71T9zTt9PZ<> — MIKEL AZPARREN (\mikel_azparren) 5 de agosto de 2018<>