O alcalde de Vigo, o socialista Abel Caballero, proclamou que cos 20 de 27 concelleiros e un 67,5% dos votos que obtivo a súa candidatura este 26-M pulverizou o mellor resultado da democracia" nas cidades españolas.
Caballero compareceu exultante ante decenas de afiliados e simpatizantes e proclamou que a súa é a vitoria de toda a cidade.
"Hoxe gañou Vigo, as mulleres e homes de Vigo, e deles é este triunfo extraordinario", espetou.
Indicou así mesmo Caballero que estes resultados "requiren un inmenso agradecemento á cidade" e corroboran que o seu é un proxecto "masivamente apoiado" polos vigueses.
Abundou en que estes rexistros "non teñen precedentes na historia da democracia, e seguramente en países europeos", o que atribuíu a que leva impulsando desde hai doce anos en Vigo "un modelo político local distinto, de diálogo permanente cos cidadáns".
Abel Caballero prometeu que el e o seu equipo de goberno "van responder" a esta "confianza extraordinaria, ilimitada" que acaba de recibir nas urnas, e recoñeceu o "comportamento democrático" e o "traballo" das outras forzas políticas en campaña, nas que competiron de forma "digna".
Finalmente, o reelixido alcalde de Vigo prometeu que quedan por diante "catro anos apaixonantes" e que pensa empezar mañá mesmo "ás nove" e non ás oito da mañá, como afai, como "unha licenza para a celebración".
