Un médico do Servizo Galego de Saúde (Sergas) foi condenado a dous anos e sete meses de cárcere e á inhabilitación para o exercicio da súa profesión durante seis anos por acceder sen permiso a un historial médico no partido xudicial de Santiago de Compostela. A sentenza emitida pola sección sexta da Audiencia Provincial da Coruña, con sede en Santiago, con data de 8 de outubro e remitida aos medios de comunicación, condena a este home como autor dun delito contra a intimidade e esíxelle o pago dunha indemnización de 1.500 euros.
Os maxistrados consideran acreditado que o procesado accedeu "aproveitando a súa condición de médico do Sergas" os días 23 e 29 de xuño de 2011 á historia clínica electrónica da vítima "coa intención de coñecer o seu estado de saúde, en concreto, a existencia dun parte de baixa por incapacidade temporal laboral". A actuación produciuse "sen que existise razón asistencial algunha e sen consentimento nin coñecemento do afectado".
O tribunal, no entanto, solicita na sentenza ao Goberno a tramitación do indulto para o condenado, pois argumenta que os accesos sancionados producíronse en datas "afastadas, non constando que o prexudicado sufrise outra afectación que a referida ao delito cometido". Os maxistrados tamén destacan que a conduta axuizada "atópase no rango inferior do estándar de gravidade" que marca a lei neste tipo de casos.
Contra esta sentenza cabe recurso de casación ante a sala segunda do Tribunal Supremo.
