O novo presidente do Partido Popular, Pablo Casado, asistirá este luns ao funeral institucional en homenaxe ao primeiro presidente da Xunta de Galicia, Gerardo Fernández Albor, que se celebrará na catedral de Santiago.
Así, Casado estrearase na capital galega nun acto institucional como líder dos populares, tras a súa vitoria o pasado sábado no congreso do PP, onde se impuxo á outra candidata en liza, a exvicepresidenta do Goberno Soraya Sáenz de Santamaría.
Coincidindo coa data na que cumpriría 101 anos, o Partido Popular de Galicia honrará ao que foi o primeiro presidente autonómico, falecido o pasado 12 de xullo na súa cidade natal, Santiago de Compostela.
O funeral terá lugar a partir das 18.00 horas na catedral compostelá, onde Casado estará acompañado polo presidente da Xunta e líder do PPdeG, Alberto Núñez Feijóo, e o xefe do Lexislativo galego, Miguel Ángel Santalices.
