O presidente do PP, Pablo Casado, anunciou que o seu partido celebrará os días 1 e 2 de decembro unha Convención Nacional que estará coordinada e liderada polo titular da Xunta, Alberto Núñez Feijóo. Na apertura do curso político dos populares no municipio pontevedrés de Cerdedo-Cotobade, Casado apostou por seguir o exemplo do dirixente autonómico e "replicar" o modelo de Galicia.
Así, subliñou que esa cita de decembro será "o punto de partida" para a elaboración dos programas electorais e para abordar a "actualización" da Constitución. "Voulle propor (a Feijóo) que verse sobre a apertura do partido á sociedade, que a reflexión se centre tamén en actualizar, que non reformar, a nosa Constitución", afirmou.
"Hai que renovar a Constitución, pero non reformala. Estamos ante un PP novo pero orgulloso da súa historia", dixo a modo de símil ante os máis de 1.500 presentes neste evento celebrado na Carballeira de San Xusto.
Casado avogou porque a convención tome como referencia o artigo 1.1 da Carta Magna e sirva para fortalecer a defensa que o PP fai de España como "estado social e democrático de dereito", e tendo en conta que a sociedade "non é a mesma que hai 40 anos". Así mesmo, advertiu de que o PP debe ser "o contrapunto" aos "falsos demócratas" e a quen someten á democracia a probas "graves" co seu "populismo". Por iso, pediu que se reivindiquen os principios liberais conservadores e constitucionais do PP para "defender" a democracia e chamou a "fortalecer" o estado de dereito e a igualdade, porque "non é o mesmo o dereito á diferenza que a diferenza de dereitos".
"Se renovamos e reivindicamos o pacto constitucional, que é perfectamente vixente e actual para afrontar os retos que veñen, conseguiremos que a xente volva a reconectar cun marco que nos deu os mellores anos da súa historia", proclamou.
Ante os máis de 1.500 presentes na Carballeira de San Xusto, o líder popular afirmou que o "buenismo" do xefe do Goberno, Pedro Sánchez, trouxo "o que avisamos que ía traer", en alusión á crise migratoria e a situación catalá.
Sobre Cataluña, criticou que Sánchez consinta que os independentistas avancen pola vía actual e o Goberno non actúe con determinación ante o que se desencadea con iso, posto que "non se pode pasar dos lazos amarelos aos negros".
Recriminou, nesta liña, que a unha "muller lle partan a cara" por retirar un emblema amarelo e recordou que o seu grupo pediu unha modificación lexislativa urxente da Lei de Símbolos co propósito de que non sexa "discrecional" o seu uso.
Sobre o cruzamento de declaracións entre Sánchez e o presidente catalán, Quim Torra, apelou á "responsabilidade" e criticou unhas "vacacións" prolongadas dos gobernantes cando hai problemas de gran magnitude e o que toca é "estar aí", máxime ante unha "crispación política, xurídica e legal" como a que, baixo o seu criterio, se vive desde hai tempo.
A cúpula do PP tamén atacou ao rexedor e presidente da Federación Española de Municipios e Provincias (FEMP) por enfrontar ao norte e ao sur de Galicia por culpa dos localismos.
"Hai políticos que queren dividir Galicia, e isto non é Corea, aquí non hai norte e sur", asegurou o presidente da Xunta en relación por exemplo ás últimas declaracións de Caballero sobre a solicitude realizada polo Executivo que preside ao Goberno central para que perdoe á cidade da Coruña a débeda do seu porto exterior, "do mesmo xeito que se fixo en Valencia".
Feijóo, pola súa banda, asegurou que os vigueses, e todos os cidadáns, queren "que se saiba a verdade" do ocorrido nese accidente.
Á parte do Marisquiño, tanto Casado como Feijóo tamén demandaron ao Goberno de Pedro Sánchez que estea máis preto dos afectados pola explosión dun almacén ilegal de artefactos pirotécnicos en Tui, que se cobrou a vida dun matrimonio.
