O presidente da Xunta, Alberto Núñez Feijóo, fixo este sábado fincapé no feito de que o seu partido sempre "goberna limpamente" e o líder do PP, Pablo Casado, pediu imitar o exemplo de Galicia, posto que é a senda a seguir.
Na apertura do curso político desta organización política en Cerdedo-Cotobade (Pontevedra), Casado apostilou que sempre dixo que "ao PP a nivel nacional viríanos moi ben facer como o PP de Galicia" e máxime "cando un ve as cifras en Galicia ao primeiro nivel europeo", posto que "é cando ves que ese modelo se ten que replicar no resto de España".
Núñez Feijóo agradeceulle este comentario, para el unha "honra" e ao que corresponderán con lealdade "máxima", e asegurou no acto celebrado este asollado sábado na Carballeira de San Xusto que o seu partido comeza o curso político "con optimismo" e "ganas de gañar e gobernar limpamente", en referencia ás municipais do ano que vén, a cita electoral máis próxima.
"Imos traballar para derrotar con principios a demagoxia e dándolle valor ás urnas para que goberne o que gaña" nelas, profundou Feijóo, coa vista posta xustamente nos locais.
O presidente da Xunta dirixiuse con énfase a Pablo Casado ao asegurar que "en Galicia saímos sempre a gañar".
Feijóo recordou ademais que o Partido Popular é o primeiro partido de España e de Galicia, e "traballando por Galicia, traballamos por España". Así mesmo, subliñou que o PP ten un proxecto de país que pensa nos cidadáns e "é gañador".
Alberto Núñez Feijóo tampouco ocultou que quere recuperar as Alcaldías e as Deputacións de Galicia nas que agora non están á fronte, e van intentar facelo "con principios, para derrotar a demagoxia".
Sobre os adversarios, foi especialmente duro cos socialistas, dado que "o PSdeG actúa en Galicia como unha sucursal do PSOE e cada vez é menos partido de Galicia", como nunca antes ocorrera.
Na clausura, Pablo Casado tamén se referiu ao comezo do curso político e afirmou que "só co PP está garantido o mellor futuro dos españois".
No seu caso, que afronta as súas primeira eleccións locais como máximo responsable do partido, faio con moita "forza e moitas ganas", tal e como expresou.
Diferentes responsables provinciais situáronse, igualmente, sobre o inicio do curso político e todos coincidiron na necesidade de saír a gañar e de que é necesario "rearmarnos de face ás municipais". E concordaron tamén en que os resultados das últimas municipais foron un "castigo moi duro", aínda que se perdesen maiorías por moi poucos votos.
Á súa vez, Diego Calvo, secretario territorial do PP no novo equipo de Pablo Casado, vaticinou que "o ano que vén" haberá neste acto "moitísimos máis alcaldes", a consecuencia de saber "o que queremos facer", algo que permitirá "gobernar" nun maior número lugares.
A presidenta provincial do PP de Lugo, Elena Candia, criticou aos alcaldes que "viñan revolucionar", en alusión ás mareas, e dixo que no Partido Popular "somos a mellor opción para a calidade de vida da xente".
O presidente da Deputación de Ourense e responsable do PP nesa provincia, Manuel Baltar, apelou ao exemplo dunha forza política que é centrista, reformista e galeguista e mencionou ao expresidente de España Mariano Rajoy, que "deixou a presidencia do partido como un auténtico señor a un grandísimo nivel", á parte de solicitar "unidade e traballo" ante os novos retos.
O vicepresidente da Xunta e líder do PP en Pontevedra, Alfonso Rueda, resumiu nunha frase que "somos nós fronte a todos", pero se ata agora eran moitos, "seremos máis", presaxiou.
