Os casos activos de coronavirus en Galicia baixaron este luns do limiar das 6.000 infeccións, para situarse en 5.848, que son 268 menos que no anterior balance. A actualización do Sergas revela que se detectaron 194 novos positivos en 24 horas, 83 máis que no balance anterior.
En canto á presión hospitalaria, volve subir lixeiramente, un indicador que tal e como declarou este domingo o conselleiro de Sanidade, Julio García Comesaña, Galicia "non consegue baixar", especialmente no relativo á unidade de coidados intensivos. Galicia ten 201 pacientes con covid hospitalizados, catro máis que na última xornada, cun aumento de dous pacientes nas Uci, ata alcanzar os 48 ingresados. O resto, 153, están en planta.
Por áreas sanitarias, o descenso dos casos activos é xeneralizado por segunda xornada consecutiva, sendo o máis acusado o de Santiago, onde os casos caen en 85, ata alcanzar os 1.047. Séguena a área da Coruña, con 59 menos e un total de 1.457 casos activos; a de Vigo, que contabiliza 51 casos menos, ata os 858; a de Ferrol, que rexistra 31 menos, ata os 321; e a de Lugo, con 22 casos menos, ata os 1.221. Para rematar, Pontevedra ten 13 casos menos, ata os 358, e Ourense conta con sete menos, ata os 586.
Desde o inicio da pandemia contaxiáronse en Galicia 180.109 persoas e recuperáronse 171.709, das que 460 corresponden á última xornada. O número de falecidos ascende xa a 2.584, tras as dúas mortes comunicadas este domingo polo Sergas.
