A Catedral de Santiago apareceu este martes con novas pintadas, contra a familia real, como unha na que se podía ler "Guillotina Borbón", e tamén contra a igrexa, cunha que dicía: "Eu non saín da túa costela, ti saíches da miña cona".
O Concello de Compostela, gobernado por Martiño Noriega, condenou esta agresión ao patrimonio e na súa conta oficial de Twitter anunciou que se puxeron a disposición do cabido e tamén que se procederá á eliminación de tales inscricións da maneira que os expertos determinen.
A Policía abriu dilixencias para tratar de esclarecer o acontecido, como xa ocorrera cando a fachada de Praterías deste templo amencera, en agosto de 2018, cun rostro que imitaba a maquillaxe dun dos membros máis reconocibles de Kiss, o grupo estadounidense de rock duro.
O rexedor indicou esta vez, como entón, que "ningunha reivindicación pode servir de coartada para atentar contra o patrimonio de todas e todos".
Ciudadanos Galicia denunciou nas súas redes sociais, así mesmo, que na súa sede central da comunidade, na capital galega, produciuse un atentado similar. Este é un local no que adoitan producirse actos vandálicos de tales características con certa periodicidade.