A xerencia do Complexo Hospitalario de Vigo (Chuvi) retirou 400 colectores de esterilización do material cirúrxico logo de someter a un proceso de lavado manual 600 dos 1.892 de que dispón tras a aparición de motas brancas que resultaron ser óxido de aluminio, o que obrigou a suspender decenas de operacións, informou este luns o Sergas.
Todos estes colectores serán repostos e os 200 que pasaron con éxito o proceso de lavado están en condicións de incorporarse de novo ao circuíto de esterilización, precisou o Sergas nun comunicado.
Os técnicos seguen analizando as causas que provocaron a aparición de óxido de aluminio
Nos próximos días proseguirá o proceso de lavado ata validar individualmente os colectores restantes.
De forma paralela, os técnicos seguen analizando as causas que provocaron a aparición de óxido de aluminio.
Mentres, a actividade cirúrxica nos dous centros do Complexo Hospitalario de Vigo desenvolveuse este luns segundo o previsto, sen que fose necesario reprogramar ningunha intervención por motivos derivados dos problemas de esterilización nos colectores.
Este martes están programadas 108 intervencións cirúrxicas, 71 delas no hospital Meixoeiro e outras 37 no hospital Álvaro Cunqueiro.
