A sección segunda da a Audiencia Provincial de Pontevedrade acordo co veredicto de culpabilidade do Tribunal do Xurado, condenou a 17 anos de cárcere como autor dun delito de asasinato e doutro de intento de homicidio ao home que matou ao seu veciño cunha rozadora en xuño de 2017 na Cañiza e que tratou de acabar coa vida da filla da vítima.
Á hora de ditar a pena, a Audiencia aplicou unha eximente incompleta por considerar acreditado que o sospeitoso sufría unha "limitación parcial das capacidades psíquicas" cando cometeu os feitos. O imputado tamén foi sentenciado a indemnizar á filla do falecido con 300.000 euros; e, á muller, con 150.000 euros, do mesmo xeito que ao seu fillo.
O fallo indica que o acusado e o seu veciño mantiñan "moi malas relacións por conflitos de lindes e o uso dun camiño que derivaron en denuncias mutuas".
O día dos feitos, o condenado atopábase cunha rozadora acendida no camiño polo que mantiñan disputas e que pasa por diante da casa das vítimas. Os seus dous veciños, pai e filla, saíron do seu portal para ir á súa cuadra e dirixíronse cara a el. Nese momento, atacou ao seu veciño coa rozadora e, despois, á moza. O Tribunal do Xurado considera que o falecido non tivo capacidade de defensa, pero si a súa filla, quen sofre graves secuelas.
O xurado destaca que o condenado ten "un coeficiente intelectual límite" e que estivera a tratamento psicolóxico e psiquiátrico por trastorno ansioso depresivo. Ademais, sinala que sofre, como consecuencia "da sostida situación de hostilidade e conflito co seu veciño, así como da agresión que sufriu por parte deste no 2015, un trastorno postraumático que non estaba diagnosticado, pero que lle facía sentir medo do seu veciño".
