O Tribunal Superior de Xustiza de Galicia (TSXG) confirmou a condena a tres anos e tres meses de prisión imposta a un home que introduciu metadona na prisión de Teixeiro. Nunha sentenza do pasado 3 de outubro remitida aos medios de comunicación, a sala do civil e o penal do TSXG confirmou un fallo emitido en decembro de 2017 pola sección segunda da Audiencia Provincial da Coruña.
A Audiencia impuxera tres anos e tres meses de cárcere a un interno do centro penal de Teixeiro que introduciu droga na prisión, detalla o tribunal.
A sentenza desestimou os recursos presentados pola defensa, quen alegaba "erros na valoración e apreciación da proba", e pola Fiscalía, que demandaba un aumento da pena porque, segundo o seu criterio, a metadona debe ser considerada unha sustancia que causa grave dano á saúde.
