Durante a xornada deste domingo continuará o aumento das temperaturas e os ceos despexados en Galicia, tanto así que a cidade de Ourense podería alcanzar os 35 graos.
Segundo indica Meteogalicia, este domingo refórzase a influencia anticiclónica sobre a área noroeste da península Ibérica, con circulación do nordeste e ceos pouco nubrados ou despexados.
As temperaturas situaranse entre os 12 de mínima previstos para Lugo e os 35 de Ourense.
O vento, pola súa banda, soprará do nordeste, frouxo na metade sur, moderado no resto, con intervalos fortes no litoral entre Bares e Fisterra.
As temperaturas continuarán aumentando nos próximos días. Así, o luns espérase unha máximas de 35 graos en Ourense e 34 en Vigo e Pontevedra.
