O paro sube en Galicia en 7.639 persoas no mes de xaneiro

O número de parados rexistrados nas oficinas dos servizos públicos de emprego subiu en 7.639 persoas en xaneiro en Galicia en relación ao mes anterior, o que supón un incremento do 3,34%, case dous puntos por encima da media (+1,4%), ata situar o total en 236.447. Pontevedra foi a provincia galega cun maior repunte, dun 4,08%, tras contabilizar 3.710 parados máis que no mes previo, ata sumar 94.672.

En termos relativos, ese 3,34% de aumento foi o terceiro maior por comunidades autónomas, só superado polo de Navarra (+4,57%) e o de Cantabria (+3,82%).

Con todo, en evolución interanual, respecto das cifras de xaneiro de 2015, os desempregados galegos baixaron en 22.555, dato que representa un descenso do 8,71%, de acordo coa información que publica este martes o Ministerio de Emprego e Seguridade Social.

No conxunto estatal, o paro subiu en 57.247 persoas en xaneiro en comparación con decembro, un 1,4%; pero diminuíu en 374.936 nun ano (-8,28%) e o total de desempregados alcanzou os 4.150.755.

PROVINCIAS GALEGAS. Ademais de Pontevedra, o resto de provincias galegas tamén experimentaron crecementos do desemprego. En Lugo, 844 persoas máis inscribíronse nas listas do desemprego, o que significa que aumentaron os parados un 3,72% e chegaron a 23.540. Unha taxa similar, do 3,66%, foi a que rexistrou de subida Ourense, ao contar con 924 desempregados máis, ata un total de 26.154. Para rematar, á Coruña correspóndelle o incremento menor, do 2,4%, con 2.161 persoas máis que buscaban traballo e non o atoparon, ata 92.081. En canto á evolución anual, en 12 meses, A Coruña ten 9.523 desempregados menos (-9,37%), Pontevedra 8.874 menos (-8,57%), Lugo 2.197 menos (-8,54%) e Ourense 1.961 menos (-6,97%).

Por sexo, os 236.447 parados galegos distribúense entre 126.315 homes e 110.132 mulleres. Por idade, 11.838 son menores de 25 anos e os 224.609 restantes teñen máis. No que se refire á actividade, a variación mensual reflexa que houbo unha caída do paro en industria (-317 persoas, ata 28.535 en total) e na agricultura (8 persoas menos no desemprego, ata 9.221). Os restantes sectores rexistraron repuntes, o maior deles nos servizos (con 7.336 desempregados máis, ata 151.806), seguido do experimentado por construción (544 máis, ata 28.685).

Tamén aumentou o paro no colectivo sen emprego anterior, con 84 persoas máis, ata 18.200. Desta poboación desempregada, 1.443 son menores de 20 anos, 3.198 teñen entre 20 e 24, 2.266 entre 25 e 29, 3.854 entre 30 e 44 e 7.439, máis desa idade. Un total de 5.926 parados que non tiveron posto de traballo anterior son homes e 12.274, mulleres. O paro entre estranxeiros afecta na comunidade galega a 11.778 persoas, 286 máis que en decembro (+2,49%), pero 627 menos que en xaneiro do pasado exercicio (-5,05%). A maior contía (6.783) proceden de países extracomunitarios e 4.995, de comunitarios. En canto a sector de actividade, 6.615 inscríbense no sector servizos, 2.276 non tiveron emprego anterior, 1.091 eran da construción, 1.038 da agricultura e 758 da industria.

MENOS CONTRATOS. Mentres, asináronse 62.688 contratos, 5.958 menos (-8,68%) que en decembro, pero 267 máis que no mesmo mes do anterior ano. A maior parte (un 91,13%), 57.127, foron temporais, fronte a 5.561 indefinidos (-8,87%). Na Coruña contratouse a 27.109 persoas, en Pontevedra a 24.605, en Lugo a 6.012 e en Ourense a 4.962. Todas as provincias experimentaron retrocesos mensuais neste ámbito, pero crecementos interanuais --salvo Lugo, que tamén descendeu en variación anual.