Todas as oficinas de Correos en Galicia abrirán este mércores, día de San e festivo autonómico, para axilizar os trámites do voto por correspondencia con motivo das eleccións do próximo 12 de xullo.
En concreto, a atención ao público será de 9.00 a 14.30 horas. Os puntos de atención con horario reducido manterán o seu horario habitual durante esta xornada, na que Correos presentará o conxunto de servizos da súa rede de oficinas, ademais das xestións do voto a distancia.
Diso informou nun comunicado remitido aos medios, no que explica que os cidadáns poden realizar a súa solicitude de voto para o Parlamento de Galicia nas oficinas postais acudindo persoalmente e tamén de forma telemática na páxina web www.correos.es firma electrónica. En ambas as modalidades, o prazo de solicitude esténdese ata o 2 de xullo.
Correos recorda que, segundo a decisión adoptada pola Xunta Electoral Central, o prazo para depositar o voto por correo ampliouse ata o venres, 10 de xullo, no horario habitual das oficinas postais en toda España e, como máximo, ata as 14 horas.
Correos destacou que a apertura en festivos se suma ao conxunto de accións que leva a cabo para cumprir as obrigacións que lle son encomendadas nos procesos electorais.
Ademais, pon a disposición todos os seus medios loxísticos, tecnolóxicos e humanos ao servizo da xestión do voto por correo, e adáptase ás especiais circunstancias que concorren nestes comicios ao ofrecer aos electores todas as garantías sanitarias nos diferentes trámites que teñen que levar a cabo.
