Galicia arrinca esta semana cunha repunta dos pacientes hospitalizados con covid, que se elevan a 415 —son 42 máis que no anterior balance, do sábado—, mentres que os casos activos descenden a 20.225 —un milleiro menos—. Rexistráronse 2.865 novos casos nas últimas 24 horas e sumouse a morte doutra persoa á que se lle diagnosticara covid, o que eleva a 3.174 os falecidos desde o inicio da pandemia.
Segundo os datos actualizados este luns polo Sergas, hai 20 persoas ingresadas en Uci e crecen as atendidas en planta, a 395. Por áreas sanitarias, a presión hospitalaria aumenta nas sete, en especial na de Lugo.
Tamén é xeneralizado o descenso das infeccións activas, capítulo no que a área da Coruña segue presentando a cifra máis elevada (4.310), seguida de Vigo (3.739) e de Santiago (3.191). Completan a lista Ourense (2.459), Lugo (2.423), Pontevedra (2.176) e Ferrol (1.833).
Desde o mércores pasados os novos contaxios mantéñense por enriba dos 2.000. Esta semana arrinca con 2.865 novos casos nas últimas 24 horas.
Desde o inicio da alerta sanitaria superaron o virus 509.568 persoas en Galicia e faleceron 3.174, a última na área sanitaria de Ourense. Trátase dun home de 73 anos e, segundo o Sergas, tiña patoloxías previas.
Segundo o último informe actualizado polo Ministerio de Sanidade —o pasado venres—, a incidencia acumulada a 14 días en Galicia sitúase en 899,90 casos por 100.000 habitantes, mentres que a media estatal está en 445,80.
