O portavoz parlamentario e orgánico de En Marea, Luís Villares Naveira, terá no ourensán David Bruzos ao seu rival nas primarias internas que o partido instrumental celebrará a principios do mes de decembro, despois de que o sector crítico lograse un pacto sobre a bucina para concorrer ao proceso cunha candidatura única que faga fronte á actual dirección.
O proceso para oficializar as listas terminou este venres con dúas candidaturas en liza: a oficialista encabezada por Luís Villares e a do sector crítico, con David Bruzos á fronte.
Rodeada dun auténtico segredo por parte dos seus promotores, a candidatura de Bruzos articulouse logo de moito diálogo e discrepancias dentro do sector crítico, ao que moitas veces dá a sensación que só une o desexo de apartar a Villares.
Así, Podemos, Anova, Esquerda Unida e as mareas municipalistas negociaron ata o final a presentación dunha candidatura de unidade que puidese axuntar todos os intereses das distintas siglas e, sobre todo, ter a forza suficiente para gañar e "refundar" En Marea, á que queren darlle un xiro de 180 graos.
Algunhas fontes apuntaban este mércores a AGN que a negociación foi tan dura que incluso Anova traballaba nunha lista alternativa no caso de que non se alcanzase un acordo con Podemos, pacto que finalmente si se produciu.
