Unha vez máis o debate de política de xeneral de Galicia volveu a pór en evidencia a pouca coincidencia entre o grupo maioritario (PPdeG) e os grupos da oposición (En Marea, PSdeG, BNG), tras máis de cinco horas de negociación que conclúen sen ningún acordo de calado, pero con varios pactos entre os grupos o que fará que, contando as 40 resolucións do PP, sexan 55 iniciativas as que reciban luz verde.
No debate que marca o ecuador desta lexislatura, o PP permitirá que se aproben este xoves seis resolucións da oposición a maiores das transaccionadas, xa que apoiará as medidas para a reforma da PAC e para integración na lusofonía propostas polo BNG; xunto cunha iniciativa do PSdeG en materia de política forestal.
En Marea será o grupo cuxas propostas recibirán máis apoio do PPdeG sen necesidade de pacto previo, posto que previsiblemente aprobaranse as súas resolucións sobre os traballos para a descontaminación de lindano, sobre a redacción das directrices da paisaxe e sobre a potenciación da política cultural mediante a elaboración da Estratexia da Cultura Galega 2021.
As coincidencias de maior calado víronse referendadas dous a dous en canto ao modelo de Estado xa que mentres este xoves En Marea e BNG volverán apostar pola autodeterminación, tanto PSdeG como o PPdeG se reafirmarán en defender o actual modelo.
Nunha liña que segue esta mesma directriz, os populares adheríronse á proposta socialista para oporse a calquera proceso recentralizador de competencias, excepto cando afecte as comunidades desleais co Estado, facendo fincapé na situación catalá.
Mentres, o PSdeG pactou co grupo maioritario pedir unha nova convocatoria da Conferencia de Presidentes pero fóra do calendario electoral e reforzar o papel do Senado como cámara de representación territorial.
MEMORIA HISTÓRICA. Un dos principais escollos do día foi que o grupo parlamentario do PPdeG non foi capaz de sumar apoios ás súas propostas de resolución en cuestións de memoria histórica. Os populares expuxeron unha iniciativa na que buscaban acordar coa Federación Galega de Municipios e Provincias (Fegamp) e co Estado unha serie de actuacións "encamiñadas a facilitar ás familias de vítimas da Guerra Civil e da represión franquista a localización, exhumación e traslado, se procede, dos restos mortais dos seus familiares", pero que a oposición viu insuficiente.
O PP tamén quedará só defendendo unha iniciativa propia coa que queren impedir un uso "abusivo" das prerrogativas das que dispoñen os deputados. Neste texto, ao que En Marea e BNG oporanse mentres que o PSOE absterase, os populares pedirán a condena do Parlamento galego do "abuso" das garantías "da inviolabilidad e inmunidade de calquera dos membros da Cámara" e insta a unha utilización "prudente" das mesmas e non como "unha concepción de privilexio persoal".
A aposta de En Marea e BNG pola autodeterminacion choca coa defensa do modelo actual dos outros dous grupos
Os grupos apuraron ata os últimos minutos pero o consenso non foi posible en moitos aspectos aínda que os populares que presentaron emendas a catorce resolucións de En Marea, nove do BNG e a dez do PSdeG.
Os populares incidiron en que estas propostas estiveron orientadas a buscar consensos en materia de dependencia, infraestruturas ou innovación, pero que non se conseguiron porque os grupos da oposición entenderon que faltaba orzamento para cumprilas nun momento no que non bastan declaracións de intencións.
Os populares lanzaron catro propostas que buscando a unanimidade de todas as forzas políticas, en temas diversos como sanidade, dependencia, infraestruturas e memoria histórica, sen chegar a convencer ao resto de grupos.
Entre outros temas que ao final non se puideron pechar, a pesar de que as negociacións foron intensas, estiveron os referentes ao accidente do Marisquiño, a loita contra a violencia machista ou a educación.
O groso das propostas será votado mañá nunha sesión plenaria na cal as posturas dos grupos están aínda por determinar en varios temas, aínda que algúns xa adiantaron a súa posición de face á maioría de propostas.
En Marea, pola súa banda, negarase a apoiar ningunha das propostas do grupo maioritario, a diferenza das da oposición, que apoiará na súa práctica totalidade, fóra de dúas iniciativas do PSdeG relativas ás melloras pendentes en materia de infraestruturas e á creación dunha comisión de expertos sobre política forestal; e doutras tres do BNG, que abordan cuestións relacionadas co autogoberno, un concerto económico para Galicia e a compra do cadro A derradeira lección do mestre, de Castelao.
O BNG, que apoiará a práctica totalidade das propostas da oposición e tan só unha do PPdeG relacionada coa inspección de pontes e obras pública, anunciou que este xoves rexeitará as resolucións do PSdeG relacionadas cun incremento das pensións en base ao IPC e con alcanzar "as máximas cotas de autogoberno para Galicia" dentro do marco "establecido na Constitución Española".
O PSdeG confirmou que apoiará algo menos da metade das resolucións propostas polo PPdeG e demostrou especial coincidencia cos populares no seu concepto de organización do Estado autonómico, ademais de apoiar tamén a práctica totalidade das iniciativas de En Marea, fóra daquelas relacionadas con temas máis polémicos como o dereito a decidir.
Con todo, apenas unha vintena de resolucións do BNG recibirán o apoio socialista, xa que fixaron posturas afastadas en múltiples temas relacionados coa esfera competencial galega e as capacidades do Estado autonómico.
