Un militante independentista galego foi vítima dunha agresión o pasado xoves en Ferrol por parte dun grupo dunha decena de persoas con vínculos co "fascismo", segundo denunciou a organización Causa Galiza nun comunicado. Fontes coñecedoras dos feitos detallaron a Efe que as primeiras investigacións permitirían confirmar a identidade de dúas dos implicados.
A organización independentista advirte na nota que "se non temos que lamentar feitos tráxicos e irreversibles é por unha mera casualidade" e denuncia que os agresores actuaron con patadas "e golpes sobre a cabeza" cunha "intencionalidade homicida inescusable"
A vítima, identificada coas iniciais F.J.M., de 35 anos, tivo que recibir asistencia médica nun centro hospitalario por mor das feridas dos agresores, segundo Causa Galiza.
A organización asegura que recibiu ademais varias mensaxes de alerta sobre incidentes similares contra militantes independentistas e denuncia que se producen discriminacións polo uso da lingua galega por parte do estamento militar en Ferrol.
Tras unha denuncia cursada ante un xulgado de Ferrol pola citada agresión, a formación Esquerda Unida expresou o seu respaldo.
Fontes consultadas por Efe detallaron que a agresión se produciu na céntrica rúa Real, nas inmediacións do Concello, xunto a unha estatua en homenaxe aos confrades da Semana Santa ferrolá, ante a cal quería posar a modo de broma xunto aos seus acompañantes. Nese momento, preto dunha decena de persoas increpáronos e golpeáronos ata que caeron ao chan.
Causa Galiza indica que os supostos agresores serían coñecedores da súa traxectoria política, sindical e incluso artística, xa que o ferido forma parte dun grupo musical.
