O centro de saúde de Oímbra é motivo dunha polémica entre a CIG e o Sergas polo uso das instalacións durante a celebración da Festa do Pemento da localidade ourensá, cuxa edición deste ano ten lugar este domingo.
A CIG censurou que o Servizo Galego de Saúde "xustifique" que as instalacións do centro de saúde acollan a festa gastronómica, á vez que acusan á Xerencia de empregar a "posverdade" para "vender unha realidade falsa".
Pola súa banda, a xerencia de xestión integrada de Ourense, Verín e O Barco de Valdeorras asegura que o centro está nun edificio municipal e que a celebración non afectará a ningún espazo asistencial e que só se usarán espazos comúns do edificio.
A través dun comunicado difundido este domingo, a central nacionalista critica tamén que o Sergas argumente que o ambulatorio permanece pechado durante os fins de semana para xustificar que as dependencias sanitarias se empreguen como lugar para a celebración da degustación gastronómica.
"Basta con visualizar as fotos desta festa en anos anteriores para constatar que a Xerencia do Sergas falta á verdade, ou o que é o mesmo, utiliza a posverdade para deformar a realidade, agás que considere que todo o mundo é bobo ou, incluso, cego", apunta a CIG no seu comunicado.
Deste xeito, lamenta que o Sergas acuse o sindicato de actuar con intereses "partidistas" e de querer xerar "alarma social". "Non é a CIG a que leva aos centros de saúde a políticos do PP a degustar pementos", apostila.
Así as cousas, empraza á Consellería de Sanidade a abrir "o centro de saúde" durante as fins de semana en lugar de organizar "festas" nas súas dependencias, á vez que avanza que "estudiará" iniciar "as accións necesarias" contra esta broma "de mal gusto".
