A Deputación de Pontevedra achegará desde este xoves unha aparelladora ao equipo do Concello de Tui encargado de xestionar a tramitación dos expedientes e problemas urbanísticos relacionados coas vivendas afectadas pola explosión dun almacén clandestino de material pirotécnico en Pairamos.
Esta traballadora, informa a Deputación nunha nota, realizará as súas funcións co servizo municipal que busca solucións aos problemas que supón a situación das vivendas e á axilización dos expedientes e xestións necesarias para desbloquear a urbanización da zona do sinistro.
O ente provincial incide en que a incorporación de persoal especializado nestas tarefas era unha das principais demandas dos afectados pola explosión en Paramos, e engade que mantén a súa "total disposición" a colaborar coas axudas que fosen precisas. Recorda que segue traballando en Tui persoal dos servizos sociais da Deputación, que se desprazou á vila cando se produciu o sinistro para atender aos damnificados.