A Policía Nacional detivo a un home de 33 anos, natural de Ourense e ao que lle constan dez detencións anteriores, como presunto autor dun delito de danos tras presuntamente esnaquizar o vehículo dunha muller porque, segundo asegurou aos axentes, esta non o deixaba durmir. A denunciante xustificou que o suxeito era o seu amigo e que tocou varias veces na porta da súa vivenda para interesarse por el.
Segundo sinalaron fontes policiais, os feitos que motivaron a detención ocorreron na madrugada do pasado luns, cando ás 03.10 horas recibiron unha chamada na Sala 091 na que unha persoa alertaba que un home estaba a romper o seu coche.
Así as cousas, os axentes do Grupo de Seguridade Cidadá dirixíronse ao lugar e, á súa chegada, a denunciante manifestoulles "que se foi a interesar por esta persoa, que é amiga súa, tocando en varias ocasións na porta do domicilio sen recibir resposta". Momentos máis tarde, cando a muller xa se atopaba na vía pública, o arrestado apareceu na rúa e ameázoa de morte. A continuación, comezou a golpear o vehículo "causándolle danos, fracturando os faros dianteiros, os retrovisores e o cristal triangular traseiro esquerdo".
Ademais, o home, ao observar que a requirente levaba unha botella de viño no bolso, "quitoulla e rompeu con ela o portelo do vehículo, podendo apreciar anacos da mesma no interior do coche", segundo concretou o corpo de seguridade.
O detido, que pasará este martes a disposición xudicial, recoñeceu aos axentes actuantes que o causante dos danos fora el "porque esa muller estivo a golpearlle a porta durante un período longo de tempo e non o deixaba durmir".
