A Policía Local da Coruña detivo a un home de 37 anos de idade, que quedou a disposición xudicial, por agredir á súa parella na súa vivenda na zona de Eirís, na que tamén convivían dous menores, froito da relación entre ambos.
Os axentes foron alertados á 01.18h da madrugada deste domingo por un mozo de 21 anos, irmán da muller. Segundo relatou aos axentes, vivía coa súa irmá e o seu cuñado. Durante a noite, escoitou os berros da muller e viu como o seu cuñado a empuxaba.
Ao intervir en auxilio da súa irmá, encerellouse nunha pelexa co seu cuñado, pero abandonou a vivenda ao ser mordido por un dos tres cans de raza potencialmente perigosa que tamén estaban na casa e que carecía de rexistro e documentación.
Nese momento, decidiu porse en contacto coa Policía que ao chegar ao lugar solicitou unha dotación do 061 para asistir a ambos os homes. Tras confirmar a muller que fora agredida, os axentes detiveron o home, que quedou custodiado nos calabozos a disposición xudicial, por un delito de violencia de xénero.