Un home de 54 anos foi detido na tarde deste mércores na Coruña acusado de matar dunha coitelada á súa esposa, de 57, no que —á espera de cualificación oficial— parece ser o segundo crime machista do ano en Galicia. O suceso tivo lugar ao fío do sete da tarde nun piso do portal 34-36 da rúa da Estrela, no corazón da urbe herculina. As primeiras comprobacións forenses apuntan a que a muller, que sufría unha grave enfermidade da que se atopaba en fase terminal, sufriu un único corte no pescozo que lle causou a morte aos poucos segundos.
Ninguén no edificio nin na rúa —que é peonil e a esa hora atopábase especialmente concorrida— escoitou nada. Pero o marido da vítima telefonou ao 112 para dar conta do ocorrido. Na propia chamada confesaba que fora el, explicaron fontes próximas á investigación.
Varios axentes da Policía Nacional trasladáronse rapidamente ao escenario dos feitos. Timbraron ao piso indicado e o home abriulles a porta, confesou de novo a súa culpabilidade e deixouse arrestar sen ofrecer ningún tipo de resistencia. Xa cos grilletes postos, foi conducido ao furgón policial, unha escena que causou gran balbordo na rúa da Estrela, que concentra un gran número de bares e restaurantes coas súas respectivas terrazas, que estaban a rebordar a esa hora.
Aínda que máis tétrico foi o momento no que os empregados da funeraria retiraron o cadáver, preto do nove da noite, coa vía pública igualmente ateigada de viandantes. Os círculos xa se formaron co traslado a comisaría do home e algúns apuntaban a que a muller levaba un tempo sen saír do seu domicilio a causa do empeoramento que experimentara nos últimos meses pola súa severa doenza. Un punto que abre a porta a que o seu cónxuxe puidese acabar coa súa vida para non vela sufrir máis, pero serán os investigadores os que traten de aclarar o móbil dos feitos. Neste sentido, a Policía Nacional está a verificar se se produciron episodios de autolesión da muller.
O que confirmaron xa os axentes que examinaron a escena do crime é que no piso non había rastro algún de pelexa nin forcejeo, e que aparentemente ela non ofrecera resistencia á agresión, aínda que este último extremo tamén ha de ser tomado con prudencia xa que o seu deteriorado estado físico puido impedirlle moverse.
Tampouco constan denuncias previas por violencia machista neste matrimonio, de nacionalidade española e que ao parecer levaba xa moitos anos convivindo. Algúns veciños cualificaron a parella de "ben avenida" e din que a súa relación parecía boa.
