Axentes da Policía Nacional da Comisaría de Vigo detiveron un home de 42 anos, veciño de Vilagarcía de Arousa, como presunto autor dun delito de lesións, tras disparar a outro home co que estaba a discutir por unha débeda.
Segundo informaron fontes policiais, os feitos tiveron lugar de madrugada nunha vivenda da rúa Amieiro, entre Travesía de Vigo e Buenos Aires, onde se desprazaron varias dotacións tras recibir un aviso de que se escoitaron disparos.
Os primeiros efectivos que chegaron, axentes de paisano, observaron a través dunha fiestra da casa que había dous homes no interior discutindo, e que un deles levantou unha man esgrimindo un arma de fogo.
Tras avisar ao resto de dotacións, os policías adoptaron as medidas de autoprotección precisas e achegáronse á porta da vivenda, no momento en que esta se abría e saía o home armado. Aproveitando o factor sorpresa, os axentes abalanzáronse sobre el e lograron desarmalo e inmobilizalo.
No interior do domicilio, había outro home que sangraba pola cabeza. Segundo relatou aos axentes, mantivera unha discusión co primeiro home por unha débeda e a disputa subiu de ton ata que se encerellaron nunha pelexa.
O home coa ferida na cabeza golpeou ao outro cun obxecto e este sacou unha pistola e disparoulle, de tal modo que un proxectil lle rozou a cabeza.
Ata o lugar desprazáronse efectivos de urxencias médicas, que atenderon aos dous homes. Así, mentres que o presunto autor do disparo recibiu varios puntos de sutura, o outro home tivo que ser trasladado a un hospital, para que se lle extraesen os restos de proxectil que tiña aloxados entre os ósos do cranio e a pel.
O presunto agresor foi detido e, tras recibir asistencia médica, trasladado a Comisaría, onde se comprobou que ten antecedentes policiais. O arrestado e as dilixencias practicadas foron postos a disposición do xulgado de garda.
