A Dirección Xeral de Tráfico (DXT) iniciará este luns, 3 de xuño, unha campaña especial de control da taxa de alcoholemia e de consumo de drogas entre os condutores, que durará ata o domingo día 9.
Así, ao longo desta semana, axentes da Agrupación de Tráfico da Garda Civil intensificarán os controis deste tipo nas vías galegas, informou a Delegación do Goberno en Galicia.
Tamén se fomentará a colaboración cos concellos das catro provincias galegas para realizar probas en zonas urbanas, con especial incidencia nas zonas de lecer nocturno.
Ademais, incidirase no control de condutores de furgonetas para asegurar, deste xeito, que este tipo de vehículos, que se dedican nun número importante ao transporte de paquetería, sinalan as mesmas fontes, "desenvolven a súa actividade baixo os mesmos parámetros de seguridade e control que o resto de usuarios".
A Delegación do Goberno en Galicia recorda que o alcol é un factor concorrente ou determinante nun terzo dos accidentes mortais de circulación. "A súa presenza na condución, dependendo da súa taxa, multiplica entre 2 e 15 veces o risco de sufrir un accidente, ademais de ser un factor agravante das súas consecuencias", engade.
Por iso, a estratexia de seguridade viaria 2011-2020 establece entre os seus obxectivos descender do un por cento os positivos por alcoholemia nos controis preventivos aleatorios.
En España, case un 15% de condutores conduce tras consumir algunha sustancia que poida afectar á capacidade para unha condución segura. O cannabis (THC) e a cocaína son as dúas sustancias achadas con máis frecuencia, indica a Delegación do Goberno en Galicia.
CAMPAÑA DE 2018. Na campaña que se fixo nestas mesmas datas o pasado ano realizáronse en Galicia 20.347 probas de alcoholemia, das que 260 deron positivo (o 1,27%), segundo os datos achegados pola Delegación.
En canto ás probas de drogas, realizáronse 547, das que resultaron positivas 176 (32,17%). Entre os positivos, as maiores cifras danse nos homes (máis do 80%) con idades entre 45 a 54 anos.
