O xuíz decretou prisión para Javier G. J., de 40 anos, detido este domingo como presunto autor de delitos de agresión sexual, detención ilegal e lesións tras agredir sexualmente, reter e vexar a unha nova, nun domicilio en Ourense.
O detido pasou a disposición do Xulgado de Instrución número 1 de Ourense ao mediodía deste luns para prestar declaración por estes feitos e saíu cara á prisión nun furgón policial pasadas as tres da tarde.
Fontes xudiciais confirmaron que a Fiscalía solicitou prisión para o acusado e que a vítima se ratificou no denunciado.
O operativo policial tivo lugar ás oito da mañá do domingo na rúa San Francisco de Ourense, ata onde se desprazaron efectivos do Grupo de Operacións Especiais ( GOES) da Policía Nacional con base na Coruña ante posibles sospeitas de perigo.
A muller, que non se atopaba na vivenda cando se produciu a entrada dos axentes, denunciaría que o sospeitoso a retivo na súa casa contra a súa vontade durante varios días ademais de abusar sexualmente dela e sometela a vexacións.
Deste xeito, Javier G. J., con antecedentes, volve a prisión tras abandonala fai uns sete meses unha vez cumprida unha condena por agresión tras golpear a outra persoa cunha barra de ferro.
VERSIÓN DA NAI. En declaracións aos medios de comunicación, a nai do acusado, Ana Jiménez, negou que o seu fillo retivese a muller en contra da súa vontade e asegurou que a recolleu cando estaba tirada na rúa e que vivían e "durmían xuntos".
Segundo a súa versión, a vítima "estaba casada" con outro home ao que "lle puxo unha denuncia" polo que non descarta que tivese "medo" á súa exparella.
