Galicia vivirá este domingo unha situación intermedia entre as altas e as baixas presións, cunha fronte pouco activa que rozará a comunidade nas horas centrais do día, segundo a predición de Meteogalicia.
Deste xeito haberá ceos nubrados, excepto no leste de Lugo e Ourense, onde non chegará a influencia da fronte. En xeral, non se descarta algunha choiva débil e ocasional e xa pola tarde poderíanse abrir algúns claros.
As temperaturas mínimas experimentarán un lixeiro ascenso, mentres que as máximas quedarán sen cambios significativos.
Os ventos soprarán de compoñente oeste, en xeral, frouxos, con intervalos de moderado na costa noroeste.
Temperaturas mínimas e máximas previstas para o domingo en Galicia:
A Coruña 16° 21°, Ferrol 16° 22°, Lugo 12° 25°, Ourense 13° 28°, Pontevedra 14° 24°, Santiago 15° 22° e Vigo 14° 23°.
