O grupo de apoio loxístico da Axencia Galega de Urxencias mobilizou un vehículo ama de cría, un semiremolque de iluminación e un vehículo de coordinación cun dron para avaliar desde o aire os danos provocados polo incendio declarado na tarde deste mércores nunha nave do polígono industrial da Granxa, no Porriño.
No incendio non se rexistraron danos persoais e cos datos dos que dispón o 112 Galicia considérase que non existe ningún risco para a poboación.
O incendio está perimetrado e estabilizado, aínda que debido á carga forte térmica provocada ao arder a chatarra acumulada no exterior da nave de Alumisel aínda é necesaria a actuación dos efectivos de extinción.
No momento de producirse o incendio había traballadores na nave de Alumisel, que tiveron que ser evacuados.
EXTINCIÓN. Nos labores de extinción participan medios de Portugal, concretamente os bombeiros de Valença do Miño, e persoal de Protección Civil de Viana de Castelo, tras a activación do protocolo de cooperación transfronteiriza Ariem.
No dispositivo interveñen tamén os bombeiros do Porriño, O Morrazo, Vigo, Vilagarcía e Ponteareas; un helicóptero do servizo contra os incendios forestais, os voluntarios de Protección Civil do Porriño e Mos, Policía Local e Garda Civil, que restrinxiron a circulación dentro do polígono para facilitar o tránsito dos medios de urxencia.
O 112 Galicia tamén informou a Augas de Galicia e a Naturgy.
