O MÁIS CURIOSO da fragmentación definitiva do espazo rupturista en Galicia é que se está producindo no medio de continuas chamadas á unidade. Incluso Anova, o último en descolgarse do proxecto rupturista que apadriñou en 2012, márchase coa promesa de seguir loitando por esa unidade popular nas próximas citas electorais.
O seu líder, Antón Sánchez
O que farán finalmente decidirano os afiliados de Anova nunha asemblea que porá fin a un proceso de refundación do partido máis necesario que nunca, tendo en conta que a formación quedou sen sitio. En Marea non os representa porque se converteu "nun partido clásico" e con Podemos e Esquerda Unida tampouco atoparon o momento político oportuno para lanzarse nunha coalición común como a que mantiñan ata agora. Con todo, de cara ás municipais operarán outras dinámicas ben diferentes.
O mellor exemplo é que, sen ir máis lonxe, Ferrol en Común presentou este sábado o primeiro tramo da súa lista, copada por cargos de Esquerda Unida e Anova e que desaloxa a Podemos de calquera posibilidade de obter un concelleiro nesa candidatura. Aínda que resulta difícil de explicar no actual contexto, é unha mostra do imprevisible que é o rupturismo e do difícil que resulta descifrar as súas claves.
VILLARES. Ao mesmo tempo que Anova parece marcharse pero sen acabar de irse, desde En Marea o seu portavoz, Luís Villares, tamén estrea a súa nova etapa como partido en solitario con chamadas á unidade unha total confianza en que nas eleccións locais se propicie "un espazo de unidade arredor de principios e desexos de cambio". Nun acto na Coruña xunto aos candidatos do partido instrumental ao Congreso e o Senado, recordou que as mareas locais seguen sendo "o puntal" da súa estratexia, con eloxios cara ao "referente de unidade agregdor de maiorías sociais" que é, ao seu xuízo, a Marea Atlántica, coa que curiosamente rompeu e non garda boa relación.
"Estamos estreando un tempo novo, unha marea compasada con este novo tempo", dixo ante os seus, en referencia a que non son as cúpulas dos partidos nos despachos senón os cidadáns os que toman as decisións. E entre a cidadanía "non hai fragmentación", proclamou.
Dito isto, recordou que as "únicas condicións" que puxo En Marea para reeditar a alianza de 2015 e 2016 foron a "rexeneración democrática, participación e compromiso ético". "Os compromisos políticos non poden ser de despacho", resolveu o lucense.
EVA SOLLA. Tamén a coordinadora nacional de Esquerda Unida, Eva Solla, expresou este sábado o seu desexo de que "os compañeiros de Anova continuasen participando deste proxecto", aínda que ao final non queda outra que "respectar" a decisión que tomaron. Con todo, quita ferro á saída dos nacionalistas e de En Marea e minimiza a penalización electoral que poida ter. "Non debería facernos gran mella nas urnas", reflexionou.
A viguesa tampouco pecha a porta á futura reconciliación, aínda que cre que é pronto. "Queda moito para as autonómicas; hai que centrarse nas xerais e municipais e despois do verán empezar a traballar" en clave galega.
