A Garda Civil e a Compañía de Defensa Contra Carro do Batallón do Cuartel Xeral da Brigada Lixeira Aerotransportable (Brilat) detiveron ao condutor dun vehículo articulado de grandes dimensións que estaba a circular de forma errática, baixo o efecto de alcol e drogas, pola N-634. Os feitos producíronse cando un convoi que procedía do Campo Militar de Tiro de Parga, en Guitiriz, observou como un vehículo de gran tonelaxe invadía repetidamente o sentido contrario en varias ocasións, polo que procederon á súa detención.
Pola súa banda, os efectivos do Destacamento de Tráfico da Garda Civil de Santiago realizaron ao condutor as correspondentes probas de alcol e outras drogas, que arroxaron un resultado positivo tanto en alcol como en estupefacientes. Deste xeito, os axentes procederon a presentar unha denuncia e a inmobilizar o camión ata a súa retirada por parte doutro condutor habilitado "para evitar males maiores".
A Garda Civil puxo en valor a importancia da colaboración entre distintos órganos da Administración, que demostrou "un alto grao de concienciación coa seguridade viaria" por parte dos efectivos do Exército de Terra que interceptaron o vehículo.
