O número de persoas hospitalizadas tras resultar feridas no derrube dunha parte da dársena no Porto de Vigo, durante O Marisquiño, descendeu a seis, tras recibir a alta este martes dous dos ingresados.
Así o trasladaron fontes da Consellería de Sanidade, que concretaron que as altas foron dadas a dous pacientes que estaban ingresados no hospital Povisa.
Segundo a última actualización, en Povisa segue ingresada unha persoa ferida, mentres que outro catro están no Álvaro Cunqueiro (unha delas na Uci), e outra máis no Hospital Universitario de Santiago, onde foi trasladada desde a cidade olívica por razóns de proximidade ao seu domicilio.
Por outra banda, segue aumentando o número de persoas que se achegan aos centros sanitarios para recibir atención tras o accidente. Así, o número de persoas atendidas por feridas de diversa consideración, ata o momento, ascende a 442.
A maioría delas, 199, foron atendidas no Hospital Álvaro Cunqueiro, 109 en Povisa, 57 na PAC de Vigo, 26 en Fátima, 24 no punto de atención do 061, 11 no hospital Montecelo, 4 en Domínguez, 4 na PAC de Redondela, 7 no Castro, e 1 en Concheiro.
