Unha muller de 30 anos á que se lle imputan un total de cinco furtos cometidos en Compostela e con antecedentes por feitos similares quedou en liberdade con cargos tras pasar a disposición do xulgado de garda da cidade.
O pasado día 6 recibiuse unha chamada na sala do 091 na que un home manifestaba ser vítima dunha subtracción que terían peroetrado dúas mulleres, ás once da mañá e cando el se atopaba paseando pola zona monumental de Santiago.
Segundo o seu relato, informaron fontes policiais, este home foi abordado por dúas mulleres en actitude cariñosa que se lle achegaron e nun descoido roubáronlle a carteira, levándose máis de cen euros en efectivo.
A prema da vítima en avisar á policía, achegando datos relevantes sobre as autoras do furto, propiciou que a rápida resposta policial tivese como consecuencia a identificación destas dúas mulleres.
Por mor deste feito, os axentes lograron esclarecer catro furtos máis cometidos en Santiago desde o mes de decembro do ano pasado.
MODUS OPERANDI. O modo de proceder desta parella era abordar a persoas de avanzada idade achegándose o suficiente como para apropiarse de diñeiro ou obxectos de valor. En ocasións, este tipo de delincuentes para aproximarse ás súas vítimas utilizan como pretexto o parecido físico con algún familiar, simulan confundirlles cun coñecido e incluso, finxindo non ter recurso algún, abordan homes ofrecéndolles favores sexuais a cambio de diñeiro.
A Policía Nacional recomenda que, en caso de ser vítima dun feito delituoso deste tipo, mantéñase a calma, fíxense os detalles que axuden á identificación e se comunique canto antes.
Neste caso, constatouse a participación de dúas mulleres nos feitos, polos que conseguirían 500 euros. Só unha delas, de orixe romanesa, foi detida.
En liberdade con cargos unha moza acusada de cinco furtos en Santiago
A investigación xurdiu por mor da denuncia dun home abordado por dúas mulleres en actitude cariñosa que se lle achegaron e, nun descoido, roubáronlle a carteira
