ESTA VEZ non foron as caixas —que xa non existen, aínda que as feridas seguen abertas, como se encargou de recordarlle esta mesma semana o alcalde vigués Abel Caballero a Elena Muñoz, portavoz municipal do PP e exconselleira, á que acusou de silenciar un informe sobre a fusión—, nin as universidades, nin os aeroportos, nin a atracción do turismo foráneo... Esta vez o conflito chegou polo porto de A Coruña, para quen tanto o rexedor Xulio Ferreiro como a líder popular e conselleira Beatriz Mato piden un trato similar ao de Valencia, ao que lle foi condonada unha importante débeda polo Goberno central. Pero desde Vigo non entenden esa reclamación, que suporía saldar "gratis" un "malgasto" e ademais ignorar á cidade olívica, que non vería mal unha "compensación".
Os titulares en portada da prensa viguesa non deixaban lugar a dúbidas de que se desatou unha nova batalla norte-sur. Ou, mellor dito, sur-norte, pois esta vez as hostilidades comezaron a desatarse desde Vigo. "A Coruña quere que o dispendio en Langosteira lle saia gratis" e "unha conselleira da Xunta pide o perdón da débeda de Langosteira pero nada de compensar ao porto vigués" son dous exemplos do que se puido ler estes días na portada de Faro de Vigo, diario que nunca dubidou en ser un firme adaíl da cidade olívica cando considera que pode resultar agraviada.
E é que en Vigo non parece sentar nada ben que Beatriz Mato, conselleira de Medio Ambiente da Xunta de Galicia, pida ao Goberno de Pedro Sánchez igual trato para o porto da súa cidade —na que se perfila como candidata á alcaldía— que para o de Valencia, de onde é orixinario José Luís Ábalos, o ministro de Fomento. Unha reclamación por certo que antes fixera Xulio Ferreiro, alcalde de Marea Atlántica, a través de varias mensaxes na súa conta de Twitter nos que esixía xustiza e coherencia co sucedido no Levante, onde o Executivo central acaba de aceptar que o Estado asuma unha débeda de 350 millóns de euros do Consorcio Valencia, que xestiona as remodeladas instalacións portuarias.
Nin sentaron ben no sur galego as esixencias da conselleira —realizadas en clave local e tamén preelectoral, na súa condición de presidenta do PP herculino e máis que probable alcaldable— nin que ningún outro membro do Goberno do presidente Alberto Núñez Feijóo saia á palestra para esixir unha compensación para o porto de Vigo "se [finalmente] se lle condonan 300 millóns ao da Coruña".
As custosas obras en Valencia foron para poder acoller no seu día tanto a Copa América de vela como a Fórmula Un, mentres que no caso da Coruña o motivo da creación do porto exterior de Punta Langosteira foi afastar "os perigos de ter un porto comercial no centro da cidade", tal como recordou a propia Beatriz Mato na rolda de prensa do luns.
Mentres aumenta o polémica sur-norte por unhas obras que no seu día foron cualificadas por algúns de "malgaste" similar ao da Cidade da Cultura, o Concello da Coruña pediu esta semana á Autoridade Portuaria que convoque o seu consello de administración para abordar "a necesidade de que o Estado condone a débeda asociada a Punta Langosteira, como acaba de facer en Valencia". O concelleiro Xiao Varela enviou unha carta ao presidente do Porto da Coruña, Enrique Losada, na que explica que é posible a condonación da débeda e que é preciso actuar.
