A Garda Civil levou a cabo este xoves unha espectacular operación na rúa Amizade de Lugo para rescatar a unha menor de 15 anos que permanecía na vivenda desde o día anterior, cando supostamente foi raptada polo seu noivo en Olmedo, na provincia de Valladolid.
A operación levouse a cabo a instancias dun xulgado de Medina del Campo, despois de que a familia da menor presentase unha denuncia por secuestro. Segundo algunhas fontes, a menor foise co seu noivo aproveitando o recreo no instituto.
O mozo residente en Lugo viaxou á localidade valisoletana con algúns familiares para traerse á nena a Lugo. Tanto a menor como o mozo son, segundo algunhas fontes, de orixe romanesa e pretendían contraer un matrimonio que non foi aceptado polos pais dela.