O menor dos dous incendios forestais que desde o mércores afectaban o parque natural do Invernadoiro no municipio de Vilariño de Conso, quedou extinguido durante a tarde deste domingo, segundo informou a Consellería do Medio Rural.
A superficie afectada neste incendio, segundo as últimas estimacións, foi de 13,68 hectáreas de monte raso.
En canto ao outro incendio, de maiores dimensións e situado nunha zona de difícil acceso, mantense controlado, segundo indica a Consellería do Medio Rural, tras calcinar preto de 100 hectáreas, das que 29 son de arboledo e o resto de monte raso.
Durante estes catro días, á zona afectada trasladáronse cinco técnicos, 38 axentes forestais, 92 brigadistas, 39 motobombas, cinco pas, 14 helicópteros e 7 avións.
A Consellería recorda que os cidadáns dispoñen dun número de teléfono gratuíto (085) para chamar no caso de que detecten algún incendio forestal e que existe información actualizada sobre as situacións dos lumes nas redes sociais.
