A condutora dunha moto duns 60 anos faleceu este mércores tras chocar no Grove cun autobús. O bus, que pertence a unha empresa de Badaxoz, levaba unha excursión de xubilados, que resultaron ilesos.
A Garda Civil investiga as causas do accidente, que se produciu pasadas as 14.00 horas na estrada PO-316 na entrada do Grove, o que xerou tamén importantes retencións.
Ata o lugar desprazáronse ambulancias do 061, que realizaron durante varios minutos as manobras de reanimación á muller. Tamén acudiron Protección Civil do Grove e de Sanxenxo, Policía Local e Garda Civil.
